O maltrato entre iguais impacta no desenvolvemento da infancia, sendo un factor de risco para sufrir desaxustes psicosociais e trastornos psicopatolóxicos na adolescencia e na vida adulta.
O centro educativo é un dos principais axentes socializadores para a infancia e a adolescencia e un lugar importante para a transmisión de valores.
Educar en valores como a empatía, o respecto, a convivencia e a diversidade convértese nunha ferramenta eficaz para a prevención do acoso escolar.
Este obradoiro está dirixido ao alumnado de 5º de Educación Primaria do CEIP Plurilingüe Santa Mariña de Vigo, onde as crianzas serán as protagonistas: construíndo historias, compartindo experiencias, debatindo, manipulando coas mans e xogando.
Obxectivos:
- Favorecer un contexto seguro no que o alumnado sexa quen de expoñer as dificultades e as tensións que poidan darse na aula e no centro educativo.
- Favorecer actitudes e comportamentos de igualdade que rachen co binomio dominio-submisión e transformen os estereotipos, aceptando a diversidade.
- Comprender a relación entre as persoas agresoras, vítimas e espectadoras e tomar de conciencia de que o acoso escolar é unha cuestión de grupo.
- Potenciar relacións de amizade baseadas no respecto mutuo, a empatía e a asertividade.
DATAS: 18, 19 e 20 de Abril.
LUGAR: CEIP Plurilingüe Santa Mariña (Vigo).